የአረንጓዴ ዐሻራ መርሐ-ግብር ለኢትዮጵያውያን ተፈጥሮን የማደስ እና የምግብ ዋስትናን የማረጋገጥ ተግባር ብቻ ሳይሆን፣ ለነገዋ ሀገር ተስፋን የመትከል ታላቅ ብሔራዊ ንቅናቄ ነው።

ይህ ጉዞ ጊዜያዊ ስሜት ወይም የታሪክ አጋጣሚ ያመጣው ሳይሆን፣ ዘላቂ እና የማይበገር ሕዝባዊ ራዕይ መሆኑን በተግባር አስመስክረናል።

በተለይም ሀገራዊ እና ዓለም አቀፋዊ ፈተናዎች በተደቀኑብን አስቸጋሪ ሁኔታዎች ውስጥ እንኳን ሳይቀር ኢትዮጵያን አረንጓዴ የማልበስ የልማት ቁርጠኝነታችን በምንም ያልተደናቀፈ መሆኑን በተጨባጭ አይተናል።

ለዚህ ደግሞ ትልቁ ማረጋገጫ በ2012 ዓ.ም መላው ዓለም በኮቪድ-19 ወረርሽኝ ስጋት እና ፍርሃት በተንቀጠቀጠበት ወቅት የታየው ታሪካዊ ክስተት ነው።

በዚያ እጅግ አስቸጋሪ እና ውጥረት በነገሠበት ወቅት ኢትዮጵያውያን ተስፋ በመቁረጥ እጃቸውን አልሰጡም።

ይልቁንም "እየተጠነቀቅን እንተክላለን" በሚል ጥበብ እና ጽናት በተሞላበት መሪ ቃል፣ አስፈላጊውን የጤና ጥንቃቄ እያደረጉ ዐሻራቸውን አስቀምጠዋል። በዚህም በወረርሽኙ እገዳዎች እና ጭንቀቶች ውስጥ ሆነው ከ5 ቢሊዮን በላይ ችግኞችን መትከል ችለዋል።

ይህ ስኬት ዓለም በድንጋጤ በሮቿን በዘጋችበት ሰዓት ኢትዮጵያ ለተፈጥሮ እና ለመጻኢው ትውልድ ያላትን የጸና ፍቅር ያስመሰከረ ድንቅ የታሪክ ምዕራፍ ነበር።

በወረርሽኙ ወቅት የተመዘገበው ይህ ድንቅ ድል የሚያረጋግጠው አንድ ታላቅ እውነት አለ። ይኸውም የአረንጓዴ ዐሻራ መርሐ-ግብር ምንም ዓይነት ሰው ሠራሽም ሆነ ተፈጥሯዊ ምክንያት ሊገታው የማይችል፣ ለሥራ ዕድል ፈጠራ እና ለኢኮኖሚ ዕድገት መሰረት የሆነ ጽኑ ሀገራዊ ጉዞ መሆኑን ነው።

የዚህ የማይበገር አረንጓዴ ጉዞ ሌላው አዲስ እና ታሪካዊ ምዕራፍ ደግሞ ዛሬ ይፋ ተደርጓል። በአንድ ጀምበር 800 ሚሊዮን ችግኞችን በመትከል አዲስ የዓለም አቀፍ ድል ለማስመዝገብ በተያዘው ታላቅ ዕቅድ መሠረት ወደ ተግባር ለመግባት የቀሩት 5 ቀናት ብቻ ናቸው።

ይህ ጥሪ የኢትዮጵያውያንን አንድነት፣ ጽናት እና ተፈጥሮን የማደስ ቁርጠኝነት ወደ አዲስ የከፍታ ደረጃ የሚያሸጋግር ነው።

መላው ሕዝብ እንደወትሮው ሁሉ በአንድነት በመቆም አዲስ ታሪክ ለመጻፍ በከፍተኛ ዝግጅት ላይ ይገኛል። እርስዎስ ለዚህ ታሪካዊ ቀን ምን ዝግጅት እያደረጉ ነው? የተከላ ቦታዎን መርጠዋል? ሀሳብዎን እና ዝግጅትዎን ከታች ባለው የአስተያየት መስጫ ላይ ያጋሩን!

በሔዋን ጌታቸው