የአንድ ሀገር ጥንካሬ እና ዘላቂ ልማት የሚረጋገጠው አስተማማኝ እና ወቅቱን የዋጀ የደኅንነት ተቋም ሲኖር በመሆኑ፣ የኢትዮጵያ ሀገር መከላከያ ሠራዊት ታሪካዊ ጀግንነቱን እና የሀገር ፍቅር እሴቱን መነሻ በማድረግ ዘመናዊ የጦር ሳይንስን እና የላቀ ቴክኖሎጂን ያካተተ አጠቃላይ የሪፎርም እና የአቅም ግንባታ ሥራዎችን ማከናወን ችሏል።

በአሁኑ ወቅት የመከላከያ የትምህርት እና ሥልጠና ተቋማት የሚሰጡ ትምህርቶች በከፍተኛ ወታደራዊ ሳይንስ፣ በስትራቴጂካዊ አመራር እና በቴክኖሎጂ የበለጸጉ በመሆናቸው ሰራዊቱ ማንኛውንም ሀገራዊ እና ቀጣናዊ ስጋቶች አስቀድሞ የመተንተን እና የመከላከል አቅሙን አሳድጓል።

የ21ኛው ክፍለ ዘመን የደኅንነት ስጋቶችን ለመመከትም የባሕር፣ የአየር እና የምድር ኃይሎችን በአንድነት በማቀናጀት የመረጃ፣ የሳይበር እና የዘመናዊ ትጥቅ አቅሙን በከፍተኛ ደረጃ የገነባ ሲሆን፣ ይህም የሀገራችንን ድንበር እና ስትራቴጂካዊ ጥቅሞች በአስተማማኝ ሁኔታ ለመጠበቅ የሚያስችል ጽኑ መሠረት ጥሏል።

የኢትዮጵያ መከላከያ ሠራዊት የሀገርን ድንበር ከመጠበቅ ባለፈ በተባበሩት መንግሥታት እና በአፍሪካ ሕብረት የሰላም ማስከበር ተልዕኮዎች ባሳየው እውነተኛ ሙያዊ ብቃት እና የሕዝብ ወገንተኝነት የሀገራችንን ቀጣናዊ ተጽዕኖ ፈጣሪነት እና ዓለም አቀፍ መልካም ስም ከፍ አድርጎታል።

ከዚህ በተጨማሪም በሀገራዊ የልማት እንቅስቃሴዎች፣ በተፈጥሮ አደጋዎች እና በድንገተኛ ሕዝባዊ እርዳታዎች ወቅት በሚያሳየው ፈጣን ምላሽ ከሕዝቡ ጋር ያለውን ጠንካራ የመከባበር እና የእምነት ትስስር አጠናክሯል።

በቴክኖሎጂ እና በሳይንስ ዕድገት የታገዘው ይህ የሠራዊት ግንባታ የወታደራዊ ዝግጁነት ብቻ ሳይሆን የሀገር ነፃነትን፣ የታሪክ ከፍታን እና የኢኮኖሚያዊ ስትራቴጂዎችን የማስከበር ተግባር በመሆኑ፣ ሰራዊታችን የሀገራችንን ከፍታ የሚያረጋግጥ እና ብሔራዊ ጥቅሟን በአስተማማኝ ሁኔታ የሚያስከብር ቁመና ላይ ይገኛል።

በአድማሱ አራጋው