በጥንታውያን ዘንድ ብዙ ፍርሃትና ግርምት ይፈጥር የነበረው፣ በሳይንሱ ደግሞ እጅግ አስደናቂው የጠፈር ትዕይንት ተብሎ የሚገለጸው የጨረቃ ግርዶሽ ዛሬ ሌሊት በኢትዮጵያ ሰማይ ላይ ይከሰታል።

ሐሙስ ለዓርብ አጥቢያ በሚደረገው በዚህ ሁነት፣ ሙሉ ጨረቃ በመሬታችን ጥቁር ጥላ ውስጥ አልፋ እስከ 96 በመቶ የሚሆነው ገጽታዋ ሲሸፈንና ወደ ዝገት ቀይ ቀለም ስትቀየር የማየት እድል ይገጥመናል።

ይህ ክስተት ዝም ብሎ በድንገት የሚከሰት ሳይሆን፣ ከሁለት ሳምንት በፊት በስፔን ሰማይ ላይ ከተከሰተው ታላቁ የፀሐይ ግርዶሽ ጋር በጥንድ የተያያዘ የጠፈር ዳንስ ነው።

ጨረቃ መሬትን የምትዞርበት መንገድ በ5 ዲግሪ ያህል ያጋደለ በመሆኑ በየወሩ ግርዶሽ ባይፈጠርም፣ በዓመት ሁለት ጊዜ ግን ፀሐይ፣ መሬት እና ጨረቃ በአንድ መስመር ላይ ይሰለፋሉ።

ይህ በሳይንሱ "የግርዶሽ ወቅት" ተብሎ የሚጠራው መስኮት ሲከፈትም፣ የፀሐይ እና የጨረቃ ግርዶሾች በሁለት ሳምንት ልዩነት ተከታትለው መከሰታቸው የሳይንስ ግዴታ ይሆናል።

ዛሬ ሌሊት ጨረቃ በመሬት ጽልም ጥላ ውስጥ ስታልፍ ሙሉ በሙሉ ጨልማ አትጠፋም። ከዚህ ይልቅ የመሬታችን ከባቢ አየር የፀሐይን አጫጭር ሰማያዊ ብርሃናት ስቦ አስቀርቶ፣ ረዣዥሞቹን ቀይ የብርሃን ሞገዶች ብቻ አሳልፎ ወደ ጨረቃ ገጽታ ስለሚረጫት፣ ጨረቃ ውብና ግርማ ሞገስ ያለው "የደም ጨረቃ" (Blood Moon) መልስ ትይዛለች።

በኢትዮጵያ የምንገኝ ታዛቢዎች ይህንን ድንቅ የተፈጥሮ ክስተት ከሌሊቱ 11፡33 እስከ ጠዋቱ 12፡15 ባለው ጊዜ ውስጥ በምዕራብ በኩል አድማስ ላይ በግልጽ መመልከት እንችላለን።

ከፀሐይ ግርዶሽ በተለየ መልኩ ይህን ሁነት ለመመልከት ምንም ዓይነት የዓይን መከላከያ መነጽር የማያስፈልግ በመሆኑ፣ ቀና ብሎ ወደ ሰማይ በመመልከት ብቻ የፍጥረት ጥበብን ማደንቅ እንደሚቻል የኢትዮጵያ ስፔስ ሳይንስ ሶሳይቲ መረጃ አመላክቷል።

ይህ አጋጣሚ የዘንድሮው ዓመት የመጨረሻው የግርዶሽ ክስተት በመሆኑ እና ቀጣዩ መሰል ታላቅ የጨረቃ ግርዶሽ እስከ ታኅሣሥ 2021 ዓ.ም ድረስ የማይመለስ በመሆኑ፣ ዛሬ ሌሊት ሰማዩ ግልጽ ከሆነ አደራዎን ቀና ብለው ይህንን አስደናቂ የተፈጥሮ ድንቅ እይታ እንዳያመልጥዎት።