የኢትዮጵያ ንግድ ባንክ የ2019 አዲስ ዓመት በዓልን ምክንያት በማድረግ "አዲሱን ዓመት በአገልጋይነት እና በበጎነት" በሚል መሪ ቃል ለአቅመ ደካማ ወገኖች ማዕድ አጋርቷል።

በኮዬ ፈጬ ክፍለ ከተማ በተካሄደው የማዕድ ማጋራት መርሐ ግብር ላይ የተገኙት የኢትዮጵያ ንግድ ባንክ ቃሊቲ ዲስትሪክት ዳይሬክተር ሲሳይ ደጀኔ ባንኩ ማኅበራዊ ኃላፊነቱን ለመወጣት እና የሕዝብ አጋርነቱን ለመግለጽ በየዓመቱ በሚሊዮኖች የሚቆጠር ገንዘብ በመመደብ የማዕድ ማጋራት መርሐ-ግብር ያከናውናል ብለዋል።

የ2019 አዲስ ዓመትን በማስመልከት በቃሊቲ ዲስትሪክት ለ200 አቅመ ደካማ ወገኖች ድጋፍ መደረጉን ሲሳይ ጨምረው ገልጸዋል።

የኮዬ ፈጬ ክፍለ ከተማ ምክትል አስተዳዳሪ ኬምቦን ሞቱማ በበኩላቸው የኢትዮጵያ ንግድ ባንክ አቅመ ደካማ ወገኖችን ለመደገፍ በራሱ ተነሳሽነት መልካም ሥራ በማከናወኑ አመስግነው፤ ባንኩ ማኅበራዊ ኃላፊነቱን በመወጣት ወገኖቹን መደገፉ የሚደነቅ ነው ብለዋል።

ባንኩ የ2019 አዲስ ዓመትን በማስመልከት በመላ ኢትዮጵያ የሚገኙ አቅመ ደካማ ወገኖችን ለመደገፍ ከ72 ሚሊዮን ብር በላይ በጀት መመደቡን ታውቋል።

ድጋፉን ያገኙ አቅመ ደካማ ወገኖችም፣ የኢትዮጵያ ንግድ ባንክ ችግራቸውን በመገንዘብ ከጎናቸው በመቆሙ ልባዊ ምስጋናቸውን አቅርበዋል።

በብሩክታዊት አስራት