ሉዓላዊ የባሕር በር ባለቤትነት ከኢኮኖሚ ፋይዳው ባለፈ ለሀገር የቴክኖሎጂ ሽግግርና ለፈጠራ ዕድገት ወሳኝ መሠረት መሆኑ ይታመናል።
አንዲት ሀገር የራሷ የባሕር በር ሲኖራት፣ የባሕር ላይ ምህንድስናን በማዘመን የላቁ ብረታ ብረቶችን የማምረት፣ የሀይድሮ-ዳይናሚክስ ንድፍ ፈጠራን የመተግበርና ግዙፍ መርከቦችን በኮምፒውተር ቁጥጥር ለመምራት የሚያስችሉ የአውቶሜሽን ሥርዓቶችን የመገንባት ሰፊ ዕድል ይፈጠርላታል።
ይህም በባሕር ላይ ሳይንስና በመርከብ ግንባታ ዘርፍ የቴክኖሎጂ መሪ የመሆን ዕድልን ያመቻቻል።
ከዚህም በተጨማሪ ሉዓላዊ የባሕር በር ባለቤትነት የሰው ሠራሽ አስተውሎትን እና የ"ኢንተርኔት ኦፍ ቲንግስ" (IoT) ቴክኖሎጂን በመጠቀም "ስማርት ወደቦችን" ለመገንባት ምቹ ሁኔታን ይፈጥራል።
ይህም የሎጂስቲክስ አገልግሎትን ከማዘመኑ ባለፈ፣ በባሕር ስር የሚቀበሩ የኢንተርኔት ገመዶችን በራስ መሬት ላይ በማሳረፍ የዲጂታል ሉዓላዊነትንና የመረጃ ደህንነትን ለማረጋገጥ ትልቅ ፋይዳ ይኖረዋል።
የባሕር በር መኖር እንደ ሰማያዊ ኢነርጂ ያሉ ታዳሽ የኃይል ምንጮችን ለማመንጨትና የባሕር ውኃን ወደ መጠጥ ውኃ የሚቀይሩ ዘመናዊ የውኃ ቴክኖሎጂዎችን ለማፍለቅ እንደ ግዙፍ ቤተ-ሙከራ ሆኖም ያገለግላል።
ሉዓላዊ የባሕር በር ባለቤትነት ኢትዮጵያ የሌሎችን ቴክኖሎጂ ተጠቃሚ ብቻ ከመሆን ወጥታ፣ በባሕር ላይ ሳይንስ፣ በዲጂታል መሠረተ ልማትና በታዳሽ ኃይል ዘርፎች የቴክኖሎጂ አፍላቂና መሪ እንድትሆን ታሪካዊ ዕድልን ይዞ ይመጣል።
ይህ የባሕር በር ባለቤትነት ጥረት የሀገርን የቴክኖሎጂ ሉዓላዊነት በማረጋገጥ ረገድ ያለው ሚና ከፍተኛ በመሆኑ፣ ለኢትዮጵያ ሁለንተናዊ ብልጽግና የጀርባ አጥንት ሆኖ ያገለግላል።
