ሰኞ ግንቦት 24 ቀን 2018 ዓ.ም የሚካሄደውን 7ኛውን ጠቅላላ ምርጫ በስኬት ለመፈጸም የተያዙ የቅድመ-ምርጫ ዝግጅቶች በከፍተኛ ሁኔታ ተጠናቀው ወደ መጨረሻው ምዕራፍ ተሸጋግረዋል።

በምርጫው ዕለት ከዋና ዋናና ወሳኝ አገልግሎት ሰጪ ተቋማት ውጭ ማናቸውም የሥራ እንቅስቃሴዎች ዝግ ሆነው የሚቆዩ ሲሆን፣ የፖለቲካ ፓርቲዎችና ዕጩዎች ሲያካሂዱት የነበረው የምረጡኝ ቅስቀሳ ማብቂያ ወይም የጥሞና ጊዜም ከግንቦት 20 ቀን ጀምሮ በተግባር ላይ ውሏል።

7ኛውን ጠቅላላ ምርጫ እጅግ አሳታፊና ሰፊ አማራጭ የቀረበበት ሲሆን፣ በጥቅሉ የተረጋገጡ ዕጩዎች ቁጥር 10 ሺህ 483 ገደማ ደርሷል።

በዘመናዊ መልክ በተከናወነው የዲጂታል መራጮች ምዝገባ ሥርዓት ደግሞ 5.5 ሚሊዮን ዜጎች ለመምረጥ የተመዘገቡ ሲሆን፣ ሂደቱ ፍጹም አካታች እንዲሆንም በትምህርት፣ በግዳጅና በተለያዩ ምክንያቶች ከቀያቸው የራቁ ተፈናቃዮችን፣ ተማሪዎችንና ወታደሮችን ያካተተ ልዩ የማካካሻ እርምጃ የምዝገባ ተግባር በስኬት ተከናውኗል።

የሐሳብ የበላይነትና የዴሞክራሲ ሥርዓት ግንባታ ማሳያ የሆኑት የፓርቲዎች ክርክሮችም በልዩ ትኩረት የተከናወኑ ሲሆን፣ በጥቅሉ 19 የምክክርና የክርክር መድረኮች በ5 የተለያዩ ቋንቋዎች ለሕዝብ ተደራሽ ሆነዋል።

በተጨማሪም ለፓርቲዎች እኩል ዕድል ለመስጠት ሰፊ የነፃ አየር ሰዓትና የጋዜጣ ዓምድ ድልድል የተደረገ ሲሆን፣ በዚህም መሠረት 782.5 ሰዓት በሬዲዮ፣ 520 ሰዓት በቴሌቪዥን እንዲሁም 576 የጋዜጣ ዓምዶች ለዚሁ ሀገራዊ ጥሪ እንዲውሉ ተደርገዋል።

የምርጫውን ተአማኒነት፣ ግልጽነትና ሕጋዊነት ለመጠበቅ እጅግ በርካታ ባለድርሻ አካላት ይፋዊ ባጅና ፈቃድ አግኝተው ወደ ሥራ ገብተዋል።

በዚህም መሠረት ለፓርቲ ወኪሎች ከ220 ሺህ በላይ የታዛቢነት ባጅ የተሰጠ ሲሆን፣ 55 የሀገር ውስጥ የሲቪል ማኅበረሰብ ድርጅቶችም የነፃ ታዛቢነት ፈቃድ አግኝተዋል።

ዜጎች ስለ ድምፅ አሰጣጡ ሂደት በቂ ዕውቀት እንዲጨብጡ ለማድረግ 169 ድርጅቶች የመራጮች ትምህርት ለመስጠት ዕውቅና ያገኙ ሲሆን፣ ከእነዚህ ውስጥ ለ114ቱ አስፈላጊው የገንዘብ ድጋፍ ተደርጎላቸዋል።

የምርጫ ሂደቱን በግልጽነትና በከፍተኛ ሙያዊ ሥነ-ምግባር ለዓለም አቀፉና ለሀገር ውስጥ ማኅበረሰብ ለመዘገብም 64 የሚዲያ ተቋማትና 1 ሺህ 814 ጋዜጠኞች ይፋዊ ዕውቅና አግኝተው ዝግጅታቸውን አጠናቀዋል።