ምክትል ጠቅላይ ሚኒስትር ተመስገን ጥሩነህ በማሕበራዊ የትስስር ገፃቸው ባሰፈሩት ጽሁፍ፤ ከጦርነት በላይ ሰላም ዋጋ ያስከፍላል። ትዕግሥት ያስጨርሳል፤ ትከሻ ያጎብጣል፤ እልክን ያስውጣል፤ ደካማ ያስመስላል ብለዋል።
ለዚህ ነው የሰላም ጀግንነት ከጦርነት ጀግንነት የሚበልጠው ሲሉ አስፍረዋል።
ሰላማዊ አማራጭን የተከተሉ፣ ሐሳባቸውን በጠረጴዛ ዙሪያ ለማቅረብ የፈቀዱ፣ የሠለጠነውን መንገድ ለመሞከር የቆረጡ ታጣቂዎች ሰሞኑን ወደ ተሐድሶ ማዕከላት እየገቡ ነው ሲሉ ገልጸዋል።
ይህ የሰላም ጀግንነት በመሆኑ ከአድናቆት ጋር እናመሰግናቸዋለን ያሉት ምክትል ጠቅላይ ሚኒስትሩ፤ በዚህ ውሳኔያቸው ሀገር ታተርፋለች፣ እናት ትጽናናለች፣ መሬትም ታርፋለች ብለዋል። በዚህ ውሳኔያቸው አዲስ የሰላም ጀግንነት ታሪክ እንደሚፅፉ አስረድተዋል።
የዘመናችን ትልቁ ጀግንነት የሰላም ጀግንነት ነውና ሌሎችም የእነርሱን አርአያ ተከትለው የሰላምን አማራጭ እንደሚመርጡ እናምናለን ሲሉ አስፍረዋል።
የሰላም ጀግንነትን ዐውቀው ለወሰኑ፣ ላስተባበሩ፣ መርቀው ለተቀበሉ፣ ለሰላም እና ለሕግ የበላይነት ሁሌም የማይናወጥ አቋሙን ላሳየው ሕዝባችን የከበረ ምስጋና አቀርባለሁ ብለዋል።
