በኢትዮጵያችን አዲስ የታሪክ ምዕራፍ ለመክፈትና የዴሞክራሲ ሥርዓትን በፅኑ መሰረት ላይ ለመትከል "በምርጫ ብቻ" የሚለው መርህ ብቸኛው የሰላማዊ ስልጣን ሽግግር መንገድ ነው።
ይህ መርህ የዜጎችን ሉዓላዊ የስልጣን ባለቤትነት የሚያረጋግጥና የሀገራችንን የወደፊት ዕጣ ፈንታ በሕዝብ ድምፅ ለመወሰን የሚያስችል ታላቅ የድል ጎዳና ነው።
ከእንግዲህ በኢትዮጵያ ምድር ስልጣን በጠመንጃ አፈሙዝ፣ በኃይል ወይም በሁከት የሚያዝበት ዘመን ላይመለስ አክትሟል።ይልቁንም፣ ማንኛውም የፖለቲካ ኃይል ወደ ስልጣን መውጣት የሚችለው በጠረጴዛ ዙሪያ በሚደረግ የሃሳብ ፍልሚያ እና በነፃና ዴሞክራሲያዊ ምርጫ በሚገኝ የሕዝብ አመኔታ ብቻ መሆን ይኖርበታል።
ይህ ሲሆን ነው የሀገር ግንባታ ጉዟችን ትርጉም የሚኖረው፤ ይህ ሲሆን ነው የሕግ የበላይነት የሚከበረው።
ለምን "በምርጫ ብቻ"?
የሕዝብ ሉዓላዊነት፡ ስልጣን የሕዝብ ነው! ምርጫ ዜጎች የሚመራቸውን አካል በነፃነት በመሰየም የሀገሪቱ የበላይ ባለቤት መሆናቸውን የሚያረጋግጡበት መድረክ ነው።
ለዘላቂ ሰላም፡ ችግሮችን በሰላማዊና በሕጋዊ መንገድ እንዲሁም በውይይት ሲፈታ፣ የግጭትና የጦርነት ምንጮች ይደርቃሉ። የሃሳብ ብዝሃነት የግጭት ሳይሆን የውበት ምንጭ ይሆናል።
ለሀገራዊ ብልፅግና፡ ፖለቲካዊ መረጋጋት ሲሰፍን የኢኮኖሚ እድገት ይፋጠናል፤ ኢንቨስተሮች እና ሀገር አልሚዎች በልበ ሙሉነት ይሰራሉ፤ ወጣቶችም የተሻለ ነገን ተስፋ ያደርጋሉ።
ውድ ኢትዮጵያውያን! ዴሞክራሲን ለመትከልና ለማፅናት በሚደረገው በዚህ ታሪካዊ ጥረት ውስጥ የሕዝብ ሚና ከማንም በላይ የላቀ ነው። እያንዳንዱ ድምፅ የሀገርን ሕልውና የመወሰን አቅም አለው።
ስለሆነም፣ ከፊታችን ለሚካሄደው 7ኛው ጠቅላላ ምርጫ ሁላችንም ለነፃና ዴሞክራሲያዊ ምርጫ ራሳችንን በማዘጋጀት፣ የፖለቲካ ባህላችን እንዲሰለጥን፣ በሰለጠነ መንገድ ተሳትፎ በማድረግ የኢትዮጵያን ብሩህ ተስፋ እውን እናድርግ።
ኢትዮጵያ በልጆቿ ጥረትና በዴሞክራሲያዊ አንድነት ለዘላለም ትኑር!
