የብዙ ልጆች የልጅነተ ዘመን ትውስታ በአብዛኛው ተመሳሳይነት ይታይበታል። ብዙ ጊዜ ጨዋታ እና ልምምድ በሚበዛበት በዚህ የእድሜ ክልል ውስጥ ግን አንዳንዴ አስገራሚ እና እንዴት ሆነ የሚያስብሉ ስራዎችን የሚሰሩ ልጆች አይተን ይሆናል።

ከእንደዚህ አይነት ልጆች ውስጥ አንዱ የሆነው ናታን ቶማስ በ18 ዓመቱ ታዲያ በዩኒቨርሲቲ ውስጥ ለትልልቅ ሰዎች ትምህርት በመስጠት ዓለምን አስገርሟል።

በቅርቡ የወጣው የጊነስ ወርልድ ሪከርድ እንደገለፀው፣ ይህ ብሩህ አእምሮ ያለው ታዳጊ በታሪክ የዓለማችን ትንሹ ወንድ ፕሮፌሰር ተብሎ በይፋ ተመዝግቧል።

ቀደም ሲል ይህ ክብረ ወሰን በ1717 የተመዘገበው በስኮትላንዳዊው የሂሳብ ሊቅ ኮሊን ማክላውሪን እጅ ነበር፤ እርሱም መምህር የሆነው በ19 ዓመቱ ነበር።

ይህ ህጻን ገና መራመድና መናገር በጀመረበት ወቅት ነበር ለየት ያለ የሂሳብና የሳይንስ ችሎታ እንዳለው የታወቀው።

እኩዮቹ ካርቱን በሚመለከቱበት እድሜ እሱ ግን ውስብስብ የሆኑ የፊዚክስ ቀመሮችን ይፈታ ነበር። ይህ ልዩ ተሰጥኦውም በብዙ የዓለም ክፍሎች ባሉ ዩኒቨርሲቲዎች ዘንድ ትኩረት እንዲስብ አድርጎታል።

አጃኢብ የሚያሰኘው ነገር እሱ የሚያስተምራቸው ተማሪዎች ከእሱ በእድሜ በሶስት እና በአራት እጥፍ የሚበልጡ የዩኒቨርሲቲ ወጣቶች መሆናቸው ነው።

አንዳንዶቹ ተማሪዎቹ ከእርሱ እድሜ ጋር በእጅጉ የሚራራቁ ቢሆኑም፣ እሱ ግን ይህንን እንደ ችግር አያየውም። እርሱ እንደሚለው "አንዴ ክፍል ውስጥ ከተገባ በኋላ ዋናው ነገር መማር እና ማስተማር ነው። እድሜ ለውጥ አያመጣም፤ የእኔ ትኩረት ተማሪዎቼን በሚገባ መርዳት ላይ ብቻ ነው" በማለት ለስኬቱ ያለውን ቁርጠኝነት ይገልጻል።

አሁን ላይ በማያሚ ዩኒቨርሲቲ የህግ ትምህርት እየተከታተለ ይገኛል። እቅዱም ኢንጂነሪንግ እና ህግን በማጣመር፣ በአእምሯዊ ንብረት እና በፓተንት ህግ ዘርፍ ስኬታማ ባለሙያ መሆን ነው።

ይህ ታዳጊ ለዓለም ያስመሰከረው ትልቅ እውነት ቢኖር እውቀት በዕድሜ እንደማይለካ ማረጋገጡ ነው። ወደፊትም ይህ ታዳጊ የዓለማችንን ትልልቅ ችግሮች የሚፈታ ግኝት ይዞ እንደሚመጣ ጥርጥር የለውም።

እናንተስ? በልጅነታችሁ ምን ትሰሩ ነበር? ወይስ አሁንም "ጊዜው አልረፈደም" ብላችሁ አዲስ ነገር ለመጀመር አቅዳችኋል? ሃሳባችሁን በኮሜንት አካፍሉን።

በቢታኒያ ሲሳይ