የአፍሪካ አህጉራዊ ነፃ የንግድ ቀጣና ስምምነት (AfCFTA) ለአፍሪካ አዲስ የኢኮኖሚ ምዕራፍ ይዞ ብቅ ያለ ታሪካዊ ስምምነት ሲሆን፣ የዓለም የንግድ ድርጅት ከተመሠረተ ወዲህ በዓለም ላይ ከፍተኛ ቁጥር ያላቸውን ሀገራት በአንድ ላይ ያቀፈ ትልቁ የነፃ ንግድ ቀጣና ተብሎ ይነገራል።

ይህ ስምምነት በአጠቃላይ ከ1.5 ቢሊዮን በላይ የሕዝብ ቁጥር እና ከ3 ትሪሊዮን ዶላር በላይ አጠቃላይ ጥቅል ምርት (GDP) ያለውን ግዙፍ ገበያ በአንድ ላይ የማስተሳሰር ታላቅ አቅም ያለው ነው።

ፈራሚ የሆኑት የአፍሪካ አባል ሀገራት እርስ በእርስ በሚያደርጉት የንግድ ልውውጥ ላይ እስከ 90 በመቶ የሚሆነውን የግብይት ምርት ከቀረጥ ነፃ በሆነ መንገድ እንዲያዘዋውሩ ያስገድዳል።

በአፍሪካ ታሪክና በዲፕሎማሲ ስሟ ጎልቶ የሚነሳው ሀገራችን ኢትዮጵያም ለዚሁ ስምምነት ተስማሚ የሆኑ ሕግጋትንና መመሪያዎችን ቀድማ በማፅደቅ ግንባር ቀደምነቷን አስመስክራለች።

በተግባርም የግብርና እና የኢንዱስትሪ ምርቶቿን ወደ ተለያዩ የአፍሪካ ሀገራት መላክ በመጀመር ስምምነቱን ወደ መሬት ካወረዱ ቀዳሚዎቹ ሀገራት ተርታ በኩራት ተሰልፋለች።

ይህ አህጉራዊ ስምምነት ሀገራት ያላቸውን ምርት ይዘው ወደዚህ ሰፊ ገበያ እንዲገቡና ተጠቃሚ እንዲሆኑ ሰፊ ዕድል የሚፈጥር ነው።

ሩቅ ከሚገኙት የአውሮፓ እና የእስያ ሀገራት ጋር ሲነፃፀር በአቅራቢያ የሚገኝ የገበያ አማራጭ በመሆኑ የሎጀስቲክስ እና የትራንስፖርት ወጪን በእጅጉ በመቀነስ ለአምራቾችና ለላኪዎች ትልቅ የኢኮኖሚ እፎይታን ይሰጣል።

የተፈጠረው ምቹ ሁኔታ በአግባቡ ጥቅም ላይ ከዋለ ለበርካታ ዜጎች አዲስ እና ዘላቂ የሆነ የሥራ ዕድል መፍጠር የሚቻል ሲሆን፣ ከዚህ ባለፈም ኢትዮጵያን ጨምሮ የክፍለ አህጉሩን ሀገራት በንግድ ሰንሰለት በማስተሳሰር ለሀገራዊ የኢኮኖሚ ዕድገት እና ለዜጎች የኑሮ መሻሻል ጉልህ አበርክቶ ይኖረዋል።

ለአፍሪካ ሀገራት የኢኮኖሚ መነቃቃት እና ለእርስ በእርስ የንግድ ልውውጥ ትልቅ መሣሪያ የሆነው ይህ ስምምነት፣ በተለይ ጥሬ ምርትን ብቻ ሳይሆን እሴት የተጨመረባቸውን የኢንዱስትሪ ምርቶች እርስ በእርስ ለመገበያየት በር የሚከፍት በመሆኑ አፍሪካን የዓለም የንግድ ማዕከል ማድረግ የሚያስችል አቅም አለው።

ይህ ታላቅ አጋጣሚ በተለይ በዓይነትና በጥራት እያደጉ ለመጡት የኢትዮጵያ የኢንዱስትሪ እና የገበያ ምርቶች ዘላቂ፣ አስተማማኝ እና ሰፊ የገበያ ዋስትናን የሚሰጥ ሲሆን፣ ስምምነቱ ሙሉ ለሙሉ ወደ ተግባር ሲቀየርና የንግድ እንቅስቃሴው ሲፋጠን ሀገራችን ኢትዮጵያን የአፍሪካ ዋነኛ የንግድ ቀጣና ማዕከል ያደርጋታል ተብሎ በከፍተኛ ደረጃ ይጠበቃል።