የኢፌዴሪ አየር ኃይል 90ኛ ዓመት የምሥረታ በዓሉን ሲያከብር፣ በታሪኩ አይቶት የማያውቀውን ሁለንተናዊ የሪፎርም እና የተቋም ግንባታ ምዕራፍ ላይ ሆኖ ነው።

ይህ አንጋፋ ተቋም በአሁኑ ወቅት የደረሰበት ከፍታ፣ ጠቅላይ ሚኒስትር ዐቢይ አሕመድ (ዶ/ር) የሀገረ መንግሥት ግንባታን ለማጽናት ካስቀመጡት ሰፊ እሳቤ ጋር በጥብቅ የተቆራኘ ነው።

የተቋም ግንባታ እሳቤ እና አየር ኃይሉ

የሀገር መከላከያ ሠራዊት እና በተለይም አየር ኃይሉ፣ ኢትዮጵያን እና ሕገ-መንግሥታዊ ሥርዓቷን በታማኝነት የሚያገለግል፣ እራሱን እና ሀገርን የሚያስቀጥል ተቋም በመሆን ከወገንተኝነት የፀዳ እና ለሀገራዊ ሉዓላዊነት ብቻ የቆመ ተቋም ሆኖ እንዲገነባ ሰፊ ሥራዎች ተከናውነዋል።

ጠቅላይ ሚኒስትሩ በ"መደመር" እሳቤያቸው ውስጥ እንደገለጹት፣ የተቋማት ድቀት የፖለቲካ ባህላችንን በማበላሸት ለዴሞክራሲ ግንባታ እንቅፋት ሆኖ ቆይቷል። በመሆኑም አየር ኃይሉን ከነበረበት ተቋማዊ ድቀት በማውጣት፣ በቴክኖሎጂ የላቀ እና በሰው ኃይል የሠለጠነ እንዲሆን የተከናወኑ ሥራዎች ለሀገረ መንግሥቱ ጽናት መሠረት ሆነዋል።

የአየር ኃይሉ ግንባታ በዋናነት ያተኮረው በሚከተሉት ነጥቦች ላይ ነው፡-

የቴክኖሎጂ ሽግግር እና ልቀት፦ ዘመኑን የዋጁ የጦር አውሮፕላኖች እና ሰው አልባ ቴክኖሎጂዎችን (Drones) በመታጠቅ፣ የሀገራችንን ሰማይ በአስተማማኝ ሁኔታ መጠበቅ የሚችል አቅም ተፈጥሯል።

የሰው ኃይል ልማት፦ በዕውቀት እና በሥነ-ምግባር የታነጸ መኮንን እና ባለሙያ በማፍራት፣ ተቋሙ የላቀ የውጊያ ብቃት እና ዝግጁነት እንዲኖረው ተደርጓል።

ተቋማዊ ሪፎርም፦ ተቋሙ ከማንኛውም ወገን ወገንተኝነት በመውጣት፣ ሁሉንም ኢትዮጵያውያን በእኩልነት የሚያገለግል እና የብዝኃነት ውበት የሚንጸባረቅበት እንዲሆን ተደርጓል።

ሀገረ መንግሥትን ከማፅናት አንጻር ያለው ሚና

ጠንካራ አየር ኃይል መገንባት ማለት የኢትዮጵያን የኅልውና ዋስትና ማረጋገጥ ማለት ነው። ኢትዮጵያ በሁሉም መስክ እያንሰራራች ባለችበት በዚህ ወቅት እንደ አየር ኃይል ያሉ ስትራቴጂካዊ ተቋማት መጠናከር፣ ሀገሪቱ ከአደጋዎች እንድትጠበቅ እና የዴሞክራሲ ግንባታው በሰላም እንዲቀጥል ያስችላል።

አየር ኃይሉ የሀገረ-መንግሥቱን የፀጥታ ምሶሶ በማጽናት፣ በመደመር መንግሥት የሚመራው የሪፎርም ጉዞ ለስኬት እንዲበቃ የማይተካ ሚና እየተጫወተ ይገኛል።

ባለፉት ዓመታት የተመዘገቡት ስኬቶች፣ አየር ኃይሉን ከአፍሪካ ቀዳሚ እና ዘመናዊ ከሆኑ ተቋማት ተርታ አሰልፈውታል።

ይህ ስኬት ደግሞ "ኢትዮጵያ በሁለንተናዊ መልኩ ትበለፅጋለች" የሚለውን ትልቅ ሕልም ዕውን ለማድረግ የተያዘው ግብ አንዱ ማሳያ ነው።

በአጠቃላይ፣ የኢፌዴሪ አየር ኃይል 90ኛ ዓመት በዓል፣ ተቋሙ በሪፎርሙ የደረሰበትን የላቀ ደረጃ የምናይበት እና ለነገዋ ጠንካራ ኢትዮጵያ ያለንን ቁርጠኝነት የምናድስበት ታሪካዊ አጋጣሚ ነው።

የዚህ ተቋም ጥንካሬ የኢትዮጵያ ሉዓላዊነት እና የብሔራዊ ኩራታችን መገለጫ ሆኖ ይቀጥላል።

በዮናስ በድሉ

#EBC #EBCdotstream #Ethiopia #ethiopianairforce90 #የሀገርኩራት