የከተሞች ዕድገት የነዋሪዎችን የኑሮ ደረጃ በሚያሻሽልና የተቀናጀ መሠረተ ልማት በማቅረብ ላይ የተመሠረተ ነው።

ከቅርብ ጊዜያት ወዲህ በሀገራችን በተለይም በአዲስ አበባ እና በክልል ዋና ዋና ከተሞች እየተተገበረ ያለው የኮሪደር ልማት ሥራ፣ የከተሞችን መልክ ከመቀየር አልፎ ወደ ዘመናዊና ምቹ የከተማ ሥርዓት እያሸጋገራቸው ይገኛል። ይህም ከተሞችን እንደ አዲስ በመቅረጽ፣ ለነዋሪዎች የተሻለ የመኖሪያ፣ የሥራና የመዝናኛ ከባቢ በመፍጠር ረገድ ከፍተኛ አስተዋጽዖ እያበረከተ ይገኛል።

ከዚህ ቀደም የነበሩ የከተማ ልማት ሥራዎች በተበታተነ መልኩ የሚከናወኑ በመሆናቸው ለሃብት ብክነት እና ለእግረኞችና አሽከርካሪዎች እንግልት ምክንያት ነበሩ። የኮሪደር ልማት ግን የተቀናጀ አሠራርን የተከተለ በመሆኑ እነዚህን ችግሮች የቀረፈ ሆኗል።

በዚህም የመንገዶች መስፋፋት፣ የፈሳሽ ማስወገጃ መስመሮች፣ የመብራትና የቴሌኮም ገመዶች የመሬት ውስጥ ዝርጋታ በአንድ ላይ ማከናወን ተችሏል። ይህም ከተሞች የነበራቸውን የትራፊክ መጨናነቅ በመቀነስና የትራንስፖርት ፍሰትን በማሳለጥ የምድር ላይ መሠረተ ልማቶችን ከጉዳት ለመከላከል አስችሏል።

የዘመናዊ ከተሞች ዋና መለኪያ የኮንክሪት ብዛት ሳይሆን፣ ከአካባቢ ጥበቃ ጋር ያለው ስምምነት ነው። የኮሪደር ልማት የከተሞችን ውበትና ሥነ-ምህዳራዊ ሚዛን በመጠበቅ ረገድም ትልቅ ሚና ተጫውቷል።

የመንገድ ዳርቻዎችን በአበቦችና በዛፎች በመሸፈን የከተማዋን ሙቀት የመቀነስና የአየር ጥራትን በማሻሻል እንዲሁም ነዋሪዎች ከሥራ መልስ የሚያረፉባቸው፣ ስፖርት የሚሠሩባቸውና የሚዝናኑባቸው ክፍት ቦታዎች እንዲስፋፉ አድርጓል።

ዘመናዊ የመንገድ መብራቶችና የሥነ-ሕንፃ ጥበቦች ከተሞች በሌሊትም ቢሆን፣ ውብና ማራኪ ገጽታ እንዲኖራቸው አስችለዋል።

ኮሪደር ልማት ሥራ የመሰረተ ልማት ግንባታ ብቻ ሳይሆን፣ የኢኮኖሚ ማነቃቂያ መሣሪያ ነው። ሰፋፊና ደህና የመንገድ ዳርቻዎች መፈጠራቸው ለንግድ ተቋማት፣ ለካፌዎችና ለሬስቶራንቶች አዲስ እድል ከፍቷል።

በተለይም አስተማማኝ የመንገድ መብራትና የካሜራ ደኅንነት ቁጥጥር መዘርጋቱ ከተሞች በሌሊትም ክፍት እንዲሆኑ በማድረግ የምሽት ኢኮኖሚያዊ እንቅስቃሴን እንዲያድግ አድርጓል። ይህም ለአካባቢው ወጣቶች በርካታ የሥራ እድሎችን ከመፍጠሩም በላይ፣ የሀገር ውስጥና የውጭ ጎብኝዎችን ትኩረት ስቧል።

የኮሪደር ልማት ትልቅ ትኩረት የሰጠው ለእግረኛ መንገዶች፣ ለብስክሌት መስመሮች እና ለአካል ጉዳተኞች ምቹ የሆኑ መተላለፊያዎችን በመገንባት ላይ ነው። ይህም ከተሞች ሁሉንም የኅብረተሰብ ክፍሎች እኩል የሚያስተናግዱና የእግር ጉዞ ባህልን የሚያበረታቱ እንዲሆኑ አድርጓል።

የኮሪደር ልማት የሚያመጣው ዘመናዊነት ዘላቂ እንዲሆን የተገነቡትን መሠረተ ልማቶች በአግባቡ መጠገንና መንከባከብ፣ የከተማዋን ታሪካዊና ባህላዊ ቅርሶች ሳይጎዱ ማዘመን፣ እንዲሁም በልማቱ ምክንያት የሚነሱ ነዋሪዎችን ፍትሃዊ በሆነ መንገድ ማቋቋም የፕሮጀክቱን ዘላቂ ጥቅም ያረጋግጣሉ።

የኮሪደር ልማት የኢትዮጵያ ከተሞችን አሮጌ ገጽታ በመቀየር፣ ለኑሮ ምቹ፣ ለንግድ ማራኪ እና ለወደፊቱ ትውልድ የሚመጥኑ ዘመናዊ የከተማ ማዕከላት አድርጎ የመቅረፅ ሂደቱን አፋጥኖታል።

በአድማሱ አራጋው