የዓለምን የኢኮኖሚ ሥርዓት ይበልጥ ፍትሃዊ እና ሁሉን አቀፍ ለማድረግ የሚንቀሳቀሰው የብሪክስ (BRICS) ጥምረት፣ በአውሮፓውያኑ 2026 አዲስ ስልታዊ የማስፋፊያ ዕቅድ ይፋ አድርጓል። 

በጥምረቱ ታሪክ ወሳኝ ምዕራፍ ይሆናል ተብሎ በሚጠበቀው በዚህ ዓመት፣ አዳዲስ አገራትን በአባልነት ለመቀበል የሚያስችል “የአጋር አገራት ሥርዓት” በስፋት ተግባራዊ መደረግ ጀምሯል።

በአሁኑ ወቅት ከ50 በላይ አገራት ጥምረቱን ለመቀላቀል ፍላጎት ማሳየታቸው፣ ጥምረቱ በዓለም አቀፍ መድረክ እያገኘ የመጣውን ከፍተኛ ተቀባይነት የሚያሳይ እንደሆነ ተንታኞች ይገልጻሉ::

በአውሮፓውያኑ 2024 በካዛን ሩሲያ የጸደቀው ይህ አዲስ አሠራር፣ አገራት ሙሉ አባል ከመሆናቸው በፊት በጥምረቱ ሥራዎች ላይ እንዲሳተፉ ዕድል የሚሰጥ ነው። 

እስካሁን 10 አገራት (ቤላሩስ፣ ቦሊቪያ፣ ኩባ፣ ካዛኪስታን፣ ማሌዥያ፣ ናይጄሪያ፣ ታይላንድ፣ ኡጋንዳ፣ ኡዝቤኪስታን እና ቬትናም) በዚህ ማዕቀፍ ተካተዋል።

ይህ አሠራር ጥምረቱ በፈጣን ሁኔታ ሲያድግ ሊያጋጥሙ የሚችሉ የአሠራር መጓተቶችን ከመከላከል ባለፈ፣ አዳዲስ አገራት ከጥምረቱ መርሆች ጋር ተቀናጅተው እንዲሄዱ ያግዛል።

ከጥር 1 ቀን 2026 ጀምሮ የብሪክስን ተዘዋዋሪ ሊቀመንበርነት የተረከበችው ሕንድ፣ ጥምረቱን ወደ ላቀ ተግባራዊ እንቅስቃሴ ለማሸጋገር መሪነቱን ይዛለች። 

ጠቅላይ ሚኒስትር ናሬንድራ ሞዲ እንደገለጹት፣ የሕንድ ፕሬዝዳንትነት ትኩረት “ጽናትን፣ ፈጠራን፣ ትብብርን እና ዘላቂነትን መገንባት” በሚል መሪ ቃል ላይ ያተኩራል።

በዘንድሮው 18ኛው የብሪክስ ጉባኤ ላይ ሕንድ የሚከተሉትን ዋና ዋና ተግባራት ታከናውናለች ተብሎ ይጠበቃል፦

1. አዳዲስ አባላትን የመቀበል ሂደቱን በጥንቃቄ እና በሂደት መምራት።

2. አሁን ባሉት 11 አባላት መካከል ያለውን የውስጥ አንድነት ማጠናከር።

3. ዓለም አቀፍ የፋይናንስ ተቋማት ለታዳጊ አገራት ፍላጎት ምላሽ እንዲሰጡ ግፊት ማድረግ።

ኢንዶኔዥያን ጨምሮ በአሁኑ ወቅት የብሪክስ ቋሚ አባላት ቁጥር 11 ደርሷል። እነርሱም፦ ብራዚል፣ ሩሲያ፣ ሕንድ፣ ቻይና፣ ደቡብ አፍሪካ፣ ግብፅ፣ ኢትዮጵያ፣ ኢራን፣ ሳውዲ አረቢያ፣ የተባበሩት አረብ ኤምሬትስ እና ኢንዶኔዥያ ናቸው።

በተጨማሪም እንደ ቱርክ፣ ፓኪስታን፣ አልጄሪያ እና ቬንዙዌላ ያሉ በርካታ አገራት ሙሉ አባልነትን ለማግኘት ጥያቄ አቅርበው በመጠባበቅ ላይ ይገኛሉ።

የብሪክስ መስፋፋት በዓለም አቀፍ ንግድ ላይ የራሱን አሻራ እያሳረፈ ይገኛል። በጥምረቱ ውስጥ ያሉት አገራት በአሁኑ ወቅት የዓለምን ጠቅላላ የአገር ውስጥ ምርት (GDP) 39% በግዢ አቅም (PPP) የሚቆጣጠሩ ሲሆን፣ ከግማሽ በላይ የሚሆነውን የዓለም ሕዝብ ይወክላሉ።

ጥምረቱ በብሔራዊ ገንዘባቸው የመገበያየት ሒደትን በማፋጠን፣ በአንድ የውጭ ገንዘብ ላይ ብቻ ያለውን ጥገኝነት ለመቀነስና የንግድ ስጋቶችን ለመቀነስ በቁርጠኝነት እየሠራ ይገኛል።

የብሪክስ የ2026 የመስፋፋት ጉዞ ዓለም አቀፍ የንግድና የዲፕሎማሲ መስመሮችን በከፍተኛ ሁኔታ እንደሚቀይር ይታመናል። ይህ ዕድገት በተለይም እንደ ኢትዮጵያ ለሳሉ ታዳጊ አገራት አዲስ የፋይናንስ አማራጭና የተሻለ የፖለቲካ ድምፅ በመፍጠር ረገድ ትልቅ ፋይዳ አለው።

በሰለሞን ገዳ