ኢትዮጵያ የጀመረችውን ሁለንተናዊ የኢኮኖሚ እድገት ለማፋጠን እና የነገዋን የበለጸገች ሀገር ለመገንባት በምታደርገው ስትራቴጂካዊ ጉዞ ውስጥ ልዩ የኢኮኖሚ ዞኖች እና የኢንዱስትሪ ፓርኮች ግንባር ቀደም የለውጥ ሞተር ሆነዋል።
እነዚህ ማዕከላት በኢትዮጵያ የኢኮኖሚ መዋቅርን ከግብርና መር ወደ ማኑፋክቸሪንግ ከመቀየር ባለፈ፣ በዓለም አቀፍ የንግድ መድረክ ላይ ያላትን ተወዳዳሪነት እያሳደጉ የሚገኙ ቁልፎች ናቸው።
በአሁኑ ወቅት በመላው ኢትዮጵያ 14 ልዩ የኢኮኖሚ ዞኖች እና የኢንዱስትሪ ፓርኮች ተገንብተው በንቃት ስራ ላይ ይገኛሉ።
እነዚህ ዓለም አቀፍ ደረጃቸውን የጠበቁ ማዕከላት በዋናነት ኢንቨስትመንትን በከፍተኛ ደረጃ ለማሳለጥ፣ የኢንዱስትሪያላይዜሽን ጉዞን ለማፋጠን እና የኤክስፖርት እድገትን ለማሳደግ ታስበው የተቃኙ ናቸው።
ከዚህም በተጨማሪ ቀደም ሲል ከውጭ የሚገቡ ምርቶችን በሀገር ውስጥ በመተካት የውጭ ምንዛሬን ለማዳን፣ የላቀ የቴክኖሎጂና የዕውቀት ሽግግርን ለመፍጠር እንዲሁም ሰፊ የሥራ ዕድልን ለማበርከት ትልቅ አቅም ፈጥረዋል።
ይህ ግዙፍ ራዕይ በተግባር እጅግ ተስፋ ሰጪ ስኬቶችን ማስመዝገብ ችሏል። እንደ ዘመናዊው የአይሲቲ ፓርክ ያሉ ማዕከላትን ጨምሮ በእነዚህ ሁሉ ልዩ የኢኮኖሚ ዞኖች ውስጥ በአሁኑ ወቅት በተለያዩ ዘርፎች የተሰማሩ ከ300 በላይ ግዙፍ የኢንቨስትመንት ፕሮጀክቶች በንቃት እየተንቀሳቀሱ ይገኛሉ።
ይህ መጠነ ሰፊ የኢንቨስትመንት እንቅስቃሴ በሀገራችን የኢኮኖሚ ዕድገት ላይ የሚፈጥረው ግስጋሴ እንደተጠበቀ ሆኖ፣ እስካሁን ባለው ሂደት ብቻ ከ100 ሺህ በላይ ለሚሆኑ ዜጎች ቋሚ የሥራ ዕድል መፍጠር መቻሉን የኢንዱስትሪ ፓርኮች ልማት ኮርፖሬሽን መረጃ ያመላክታል።
በአጠቃላይ ሲታይ በኢትዮጵያ የሚገኙ ልዩ የኢኮኖሚ ዞኖች የኢንዱስትሪ ሽግግርን የሚያፋጥኑ እና የወደፊቱን የኢኮኖሚ መፃዒ ዕድል ብሩህ የሚያደርጉ ዋነኛ የልማት ምሶሶዎች ናቸው።
